Hernani Club Rugby Elkarteko 16 urtez azpiko taldeak Euskal Ligako fase erregularra lehen postuan amaitu ondoren, asteburu honetan estatuko harrobi handienekin batera egongo da Valladoliden. Euskal Ligan 15 partida jokatu dituzte eta horietatik bakarra galdu dute. Gainera, azkenaurreneko partidako garaipenarekin lidertza berreskuratu zuten eta momentu onean iritsiko da taldea Pepe Rojon jokatuko den txapelketara.

Hernanirekin batera CR Sant Cugat, CR El Salvador eta CR Liceo Frances taldeak ariko dira B multzoan. Lehen bi taldeen aurka larunbatean ariko dira, gaztelarren aurka goizeko 10:50ean eta kataluniarren aurka arratsaldeko 14:10ean hurrenez hurren. Igande goizean berriz, madrildarrak izango dituzte aurkari goizeko 10:10ean. Partida guztiak zuzenean jarraitzeko aukera egongo da YouTuben eta esteka zuzenak HCREko sareetan argitaratuko dira txapelketa egunetan.