Lehen taldea 44 eta 6ko emaitzarekin itzuli zen Kantabriatik Bathco taldearen aurkako partidaren ostean.

Ligako 10.jardunaldiak uste baino porrot mingarriagoa utzi zuen Santanderreko San Roman zelaian. Bathco Rugby taldea 44 eta 6ko emaitzarekin nagusitu zen atzo eguerdian jokatutako partidan. Jokoa eta markagailua hasierako minutuan oso orekatuak egon ziren baina 6nako berdinketaren ostean, etxeko taldea izan zen nagusi.

Partida hasiera oso gogorra izan zen. Batcho taldeak bi jaurtiketa izan zituen eta biak sartu ondoren 6-0 aurreratu ziren. Hala ere, Hernani Club Rugby Elkarteak ez zen atzean gelditu eta partidari eutsi zion. Anartz Elosegiren bi jaurtiketek partida berdindu zuten 31.minutuan.

Hala ere, bigarren jaurtiketa horren ostean partida erabat aldatu zen. Etxekoek beraien joko onena erakutsi eta 35.minutuan partidako lehen entsegua iritsi zen. Horren ondorioz, 16 eta 6ko emaitzarekin joan ziren jokalariak aldageletara. Bigarren zatian, berriz, Bathco izan zen nagusi. Joko erasokorra eta defentsa lanetan ondo arituz, beste lau entsegu lortu zituzten 44 eta 6ko emaitzarekin bukatzeko.

Bestetik, Hernani Club Rugby Elkartearen izenean eskerrak eman nahi dizkiegu Santanderrera gerturatu ziren herritar eta zale guztiei, partida guztian zehar eta partida amaieran ez zutelako taldeari animatzeaz utzi. Mila mila esker!